Entre o 24 e o 28 do pasado mes de marzo, os nosos compañeiros do conservatorio representaron ao centro nas mobilidades Erasmus de profesorado do curso 2024-25.

En primeiro lugar, Cecilia Blanco e Javier González, profesores de piano e trompeta respectivamente, e membros do equipo directivo do CMUS Vigo, visitaron a Academia de Música de Portimão (Portugal), onde foron recibidos polo Coordinador Erasmus André Pereira e participaron en diversas actividades nas que puideron observar a forma de traballar no centro luso.

Por outra banda, Virginia Lis, profesora de clarinete e membro do Equipo Erasmus do conservatorio, visitou o Conservatorio di Musica G. B. Martini, en Bolonia (Italia), onde foi recibida por Luisa Baldassari e participou na vida lectiva do centro, quedando abraiada coas instalacións da histórica institución e coa propia cidade italiana.

Por último, Ramón Cabezas, profesor de Fundamentos de Composición, representou ao noso centro na última das mobilidades de profesorado deste curso, visitando a Escola Universitaria de Artes de Tirana (Albania).

Dende o Equipo Erasmus, agradecemos fondamente a acollida recibida aos nosos compañeiros e compañeira, por parte de todo o persoal dos diferentes centros de acollida.

En breve, os participantes compartirán as súas experiencias, que iremos publicando progresivamente neste blog. Namentres, aquí tedes unha selección de fotos que amablemente nos proporcionaron.